NA SAMUEL NJINGA
Nemusi weSvondo munguva dzechikumuramabhachi mapurisa emudunhu guru reMasvingo akasunga mumwe muchayiri wedutavanhu reKambani yeYutong, Tonderai Mafo, uyo ane makore makumi mana nemasere zvichitevera kumuwanikidza ari mushishi yekuchayira dutavanhu raive rakatakura hwasvisvi hwembanje mumugwagwa unobva Masvingo wakananga kuBeitbridge.
Mapurisa awo aive akwenyegwa apo aive paRoadblock kuhi dutavanhu iri raive rakatakura hufashafasha hwembanje, anohi akamisa Mafo uyo unohi wakabva atatanyara ndokuvhetemesa dutavanhu iri zvine mutsindo achitiza mapurisa. Zvadero kunohi mapurisa nedutavanhu zvakaita hweshuro nembwa kudzingirirana kudzamara dutavanhu randobatwa mushure mechinhambwe chekiromita. Dutavanhu rakahonotenhegwa kuZRP Central mudhorobha reMasvingo uko rakasechwa pachibva pawanikwa masaga matanhatu aive nemapakiti makumi maviri nemasere ehwasvisvi hwembanje.
Mapurisa anohi akawanawo zvekare Satchel raPaulina Mudakuvaka wekuHarare kuRuwa iro raive nehufashafasha hwembanje kuchizotizve mabhanduru mana embanje dzaAlice Mutanda wekuHarare kuGlenView. Mbanje idzi dzinohi dzaive dzakamonegwamonegwa mumazipepa matema epulasitiki. Mbanje dzose idzi dzakapimiwa dzikawanikwa dzine huremu hunosvika makirogiramu makumi matanhatu nemaviri.
Zvichakadaizvi mapurisa akasungawo mukokeri wedutavanhu iri, Allen Mberikunashe, uyo ane makore makumi maviri nemashanu zvekare achigara muVictoria Ranch mudhorobha reMasvingo. Vashanu ava vanotarisigwa kumira pamberi pemutongi wedare munguva fupi iri kutevera.
Mapurisa anoti haasi kuhodzora svimbo mukutenhera muchizarira vose vari kupesvedzera kutogwa nekushandiswa zvisirizvo kwezvinodhaka. Hurumende nemasangano akasiyana-siyana zviri kuita chigwirangwe mukugwisana nekupedza dambudziko rekutogwa kwezvinodhaka nezhira isiriyo. Mapurisa anotendawo veruzhinji nekuda kwekushandidzana kwavari kuita navo mukugwisana nenyaya dzine chekuita nekupagwa kwedzimhosva.Veruzhinji vanokurudzigwa kuramba vakatsika magiya mukukwenyera mapurisa nechinangwa chekubetserana nawo mukudzivirira kupagwa kwedzimhosva munyika.